ជំនួយមនុស្សធម៌បន្ទាន់ រដ្ធបាលសង្កាត់ស្ទឹងមានជ័យទី២និងក្រុមប្រឹក្សាមេភូមិអនុភូមិជំនួយការភូមិនាំយកទៅផ្តល់ជូនរដ្ឋបាលខេត្តព្រះវិហារ និងចែកជូនបងប្អូនជនភៀសសឹកដល់ជំរុំដោយផ្ទាល់
ខណ្ឌមានជ័យ ៖ ជំនួយមនុស្សធម៌បន្ទាន់ ត្ត្រូវបាន លោក ទូច សំអុល សង្កាត់ស្ទឹងមានជ័យទី២ និងក្រុមប្រឹក្សាមេភូមិអនុភូមិជំនួយការនាំយកទៅផ្តល់ជូនរដ្ឋបាលខេត្តព្រះវិហារ ដើម្បីចែកជូនដល់ប្រជាជនដែលភៀសខ្លួនចេញពីតំបន់សង្គ្រាម និងចែកជូនបងប្អូនជនភៀសសឹក ដល់ជំរុំភៀសខ្លួនដោយផ្ទាល់ចំនួនពីរទីតាំង នៅខេត្តព្រះវិហារមានចំនួនរាប់ពាន់នាក់ នាថ្ងៃទី២៩ ខែកក្កដា ឆ្នាំ២០២៥ ។
លោក ទូច សំអុល សង្កាត់ស្ទឹងមានជ័យទី២ នាំយកការផ្តាំផ្ញើសាកសួរសុខទុក្ខ ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលសម្តេចគិតពីការលំបាករបស់ពុកម៉ែបងប្អូនទាំងអស់ កំពុងគេចចេញពីតំបន់កើតមានការឈ្លានពានពីសំណាក់ទាហានសៀម។
លោក លោក ទូច សំអុល សង្កាត់ស្ទឹងមានជ័យទី២បន្តថា ដោយមានកម្លាំងមហាសាមគ្គី ពីបងប្អូនរស់នៅទាំងអស់ ព្រួតដៃគ្នា ជួយឧបត្ថម្ភគាំទ្រ ទាំងថវិកា ម្ហូបអាហារ និងសម្ភារៈប្រើប្រាស់ប្រចាំថ្ងៃ សម្រាប់រដ្ឋបាលសង្កាត់ស្ទឹងមានជ័យទី២ ផ្តល់ជូនបន្តទៅជនភៀសសឹកនាពេលនេះ ។ លោក ទូច សំអុល សង្កាត់ស្ទឹងមានជ័យទី២បន្តថា សម្រាប់ពុកម៉ែបងប្អូនដែលកំពុងស្នាក់អាស្រ័យតាមជំរុំភៀសខ្លួន សូមបង្កើនការយកចិត្តទុកដាក់ ថែទាំសុខភាព អនាម័យ និងត្រូវមានសាមគ្គីភាពគ្នា ជួយគ្នាក្នុងគ្រាដ៏លំបាកនេះ ។ ហើយត្រូវចងចាំថា រាល់ការលំបាករបស់បងប្អូន រាជរដ្ឋាភិបាលកម្ពុជាក្រោមការដឹកនាំដោយសម្តេចធិបតី ហ៊ុន ម៉ាណែត និងជាពិសេសអាជ្ញាធរមូលដ្ឋាន មិនប្រងើយកន្តើយទុកឲ្យប្រជាពលរដ្ឋណាម្នាក់ដាច់ស្បៀងអាហារឡើយ ។
ក្រៅពីនាំយកគ្រឿងឧបភោគបរិភោគ និងសម្ភារៈប្រើប្រាស់ជាចាំបាច់ប្រចាំថ្ងៃ ផ្តល់ជូនរដ្ឋបាលខេត្តព្រះវិហារ ដើម្បីចែកជូនជនភៀសសឹកនៅស បានចុះដោយផ្ទាល់ សាកសួរសុខទុក្ខ និងផ្តល់ជំនួយភ្លាមៗដល់បងប្អូនជនភៀសសឹក ក្នុងជំរុំភៀសខ្លួន ដែលសុទ្ឋសឹង ចាស់ជរា កុមារតូចៗ ស្ត្រីមានផ្ទៃពោះ ស្ត្រីទើបសម្រាលកូនរួច និងជនមានពិការភាពជាដើម ។ ហើយបើតាមការបញ្ជាក់ពីបងប្អូនជនភៀសសឹក ជាស្ត្រីៗច្រើននាក់ បានឲ្យដឹងថា ប្តីនិងកូនប្រុសរបស់ពួកគាត់ កំពុងជាប់ដៃប្រយុទ្ឋតស៊ូ ជាមួយចោរសៀមឈ្លានពានដឹកដីខ្មែរនៅសមរភូមិ ដូច្នេះដើម្បី សុវត្ថិភាព ពួកគាត់ត្រូវរត់ភៀសខ្លួនចេញពីផ្ទះសម្បែង ដោយមិនមានយកទ្រព្យសម្បត្តិអ្វីមកតាមបានឡើយ សូម្បីឆ្នាំងដាំបាយក៏យកមិនទាន់ ។
បងប្អូនជនភៀសសឹកបានបញ្ជាក់ថា ពេលពួកគាត់បានមកដល់ទីតាំងជំរុំ ដែលអាជ្ញាធរបានរៀបចំក្នុងការរស់នៅប៉ុណ្ណោះអាសន្ន គឺមាន សុវត្ថិភាព និងការយកចិត្តទុកដាក់ ផ្តល់ចំនីអាហារ ថ្នាំសង្កូវ និងជម្រកបានសមរម្យ តែអារម្មណ៏ពួកគាត់នៅតែព្រួយបារម្ភពីគ្រួសារជាប្តីនិងកូនដែលកំពុងស្ថិតនៅសមរភូមិជួរមុខគ្មានស្រាក់ស្រាន្តឡើយ ។
សូមបញ្ជាក់ថា ក្រោយកើតមានសកម្មភាពឈ្លានពាន ចោរសៀមបាញ់ផ្លោងចូលទឹកដីខ្មែរតាមព្រំដែន រដ្ឋបាលសង្កាត់ស្ទឹងមានជ័យទី២ រីបានគៀរគរ ជំនួយមូលនិធិសប្បុរធម៍ភ្លាមៗពីមហាជនរស់នៅក្នុងខេត្ត និងបាននាំយកទៅចែកជូនដល់ជនភៀសសឹកដោយផ្ទាល់ ដើម្បីសម្រាលការលំបាកនាគ្រានេះ ។
រដ្ឋបាលសង្កាត់ស្ទឹងមានជ័យទី២ សូមគោរពជូនពរបងប្អូនប្រជាពលរដ្ឋទាំងអស់ ទទួលបាននូវសុខភាពល្អ សំណាងល្អ រកទទួលទានមានបាន និងជួបនូវពុទ្ធពរទាំងឡាយបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
