អភិបាលរងខេត្តកណ្ដាល ទទូចស្នើសុំឲ្យប្រជាពលរដ្ឋក្រុងតាខ្មៅ ចូលរួមរៀបចសណ្តាប់ធ្នាប់,សោភ័ណភាព និងបរិស្ថាន

ឯកឧត្តម ណុប ដារ៉ា មានប្រសាសន៍ថា កិច្ចប្រជុំផ្សព្វ ផ្សាយនាថ្ងៃនេះ មានសារៈសំខាន់ដែលរដ្ឋបាលខេត្ត កណ្តាល បានរៀបចំឡើងដើម្បីផ្សព្វផ្សាយ និងពន្យល់ណែនាំដល់បងប្អូនប្រជាពលរដ្ឋ រស់នៅតាមបណ្ដោយផ្លូវខាងលើចូលរួមសហការ សំដៅរួមគ្នាធ្វើឱ្យក្រុងមានសណ្តាប់ធ្នាប់មានរបៀបរៀបរយ,សោភ័ណភាព និងប្រយោជន៍សាធារណៈ។

ឯកឧត្តមអភិបាលរងខេត្ត មានប្រសាសន៍ថា ការសង់សំណង់មិនរៀបរយ,ការលក់ដូរលើចិញ្ចើមផ្លូវ,ការដាក់សម្ភារៈផ្សេងៗលើចិញ្ចើមផ្លូវសាធារណៈរបស់បងប្អូន គឺពិតជាបានធ្វើឱ្យមានផលប៉ះពាល់ដល់សណ្តាប់ធ្នាប់របៀបរៀបរយយ៉ាងខ្លាំង,ធ្វើឱ្យទីក្រុងគ្មានសោភ័ណភាព ជាពិសេសនោះគឺបានបង្កឱ្យមានការកកស្ទះចរាចរណ៍  ព្រមទាំងបង្កការលំបាកដល់រថយន្តពន្លត់អគ្គីភ័យ និងរថយន្តសង្គ្រោះបន្ទាន់ ចូលទៅអន្តរាគមន៍នៅពេលមានគ្រោះអគ្គីភ័យ ឬគ្រោះថ្នាក់ផ្សេងៗ ដែលអាចកើតមានជាយថាហេតុ។

ឯកឧត្ដមអភិបាលរងខេត្ត បន្តថា ផ្អែកតាមខ្លឹមសារសេចក្តីជូនដំណឹងខាងលើនេះ រដ្ឋបាលខេត្តកណ្តាល សូមធ្វើការណែនាំដល់បងប្អូនប្រជាពលរដ្ឋ ដែលមាន ការពាក់ព័ន្ធ ដូចខាងក្រោម៖

១. ត្រូវបញ្ឈប់សកម្មភាពការលក់ដូរលើចិញ្ចើមផ្លូវការដាក់តាំងសម្ភារៈផ្សេងៗលើចិញ្ចើមផ្លូវសាធារណៈ,២. ត្រូវបញ្ឈប់រាល់សកម្មភាពសាងសង់សំណង់ផ្សេងៗនៅលើដីចំណីផ្លូវសាធារណៈខាងលើ ចាប់ពី ថ្ងៃជូនដំណឹងនេះតទៅ,៣. ត្រូវធ្វើការរុះរើសំណង់មិនរៀបរយដោយ ស្ម័គ្រចិត្ត និងជញ្ជូនយកចេញឱ្យអស់ពីទីតាំងដីចំណីផ្លូវ ខាងលើ ឱ្យបានមុនថ្ងៃទី៩ ខែកក្កដា ឆ្នាំ ២០២៥ ជា កំហិត,៤. ផុតកាលបរិច្ឆេទខាងលើ ក្នុងករណីមិនអនុវត្តតាមការណែនាំ រដ្ឋបាលក្រុងតាខ្មៅ នឹងចាត់វិធានការ រុះរើដោយមិនទទួលខុសត្រូវលើការខូចខាត ឬបាត់បង់សម្ភារៈរបស់បងប្អូនឡើយ។

ឯកឧត្ដមអភិបាលរងខេត្ត ស្នើដល់អាជ្ញាធរក្រុងតាខ្មៅគ្រប់ថ្នាក់ និងមន្ទីរអង្គភាពដែលពាក់ព័ន្ធទាំងអស់ ត្រូវយកចិត្តទុកដាក់អនុវត្តឱ្យមានប្រសិទ្ធភាពខ្ពស់ និងប្រកបដោយការទទួលខុសត្រូវបំផុត ត្រូវបន្តចុះត្រួត ពិនិត្យដល់ទីតាំងផ្ទាល់ និងណែនាំដល់បងប្អូនប្រជាពលរដ្ឋផ្សេងទៀតឱ្យចូលរួមសហការណ៍ និងត្រូវហាមឃាត់ជាដាច់រាល់ការសាងសង់សំណង់ថ្មីៗបន្ថែមទៀតតាមបណ្ដោយផ្លូវលេខ២០៥នេះ៕